അഞ്ചു വര്ഷം മുന്പ് ഭാര്യയെ കൊലപ്പെടുത്തി; ജാമ്യത്തില് ഇറങ്ങിയ പ്രതി അയല്വാസിയെയും അമ്മയെയും വെട്ടിക്കൊന്നു…
പാലക്കാട്: നെന്മാറയില് കൊലക്കേസ് പ്രതി അമ്മയെയും മകനെയും വെട്ടിക്കൊന്നു. പോത്തുണ്ടി സ്വദേശി സുധാകരനും (58) അമ്മ ലക്ഷ്മിയുമാണ് (76) മരിച്ചത്. 2019ല് സുധാകരന്റെ ഭാര്യ സജിതയെ വെട്ടിക്കൊലപ്പെടുത്തിയ കേസില് ജയിലില് ആയിരുന്ന ചെന്താമര എന്ന 58കാരന് ആണ് ഇരുവരെയും കൊലപ്പെടുത്തിയത്.
ഇന്ന് രാവിലെയാണ് സംഭവം. അയല്വാസി കൂടിയായ ചെന്താമര വീടിന് മുന്നില് വച്ചാണ് ഇരുവരെയും ആക്രമിച്ചത്. കേസില് ജയിലില് ആയിരുന്ന ചെന്താമര അടുത്തിടെയാണ് ജാമ്യത്തില് പുറത്തിറങ്ങിയത് എന്നാണ് പൊലീസ് പറയുന്നത്. വാക്ക് തര്ക്കം, വ്യക്തി വൈരാഗ്യം എന്നിവ മൂലമാണ് കൊല്ലപ്പെട്ട സുധാകരന്റെ ഭാര്യയെ പ്രതി വെട്ടിക്കൊലപ്പെടുത്തിയത്. കേസില് വിചാരണ നടപടികള് പുരോഗമിക്കുന്നതിനിടെയാണ് പ്രതി ജാമ്യത്തില് ഇറങ്ങിയത്. ഇതിന് പിന്നാലെയാണ് ഇരട്ടകൊലപാതകം. ആലത്തൂര് ഡിവൈഎസ്പിയുടെ നേതൃത്വത്തില് പൊലീസ് സ്ഥലത്തെത്തി പരിശോധന നടത്തി. സംഭവത്തിന് പിന്നാലെ ഒളിവില് പോയ ചെന്താമരനെ അന്വേഷണത്തിന് ഒടുവില് പൊലീസ് കസ്റ്റഡിയിലെടുത്തു.
